काठमाडौँ महानगरपालिकाका प्रमुख बालेन्द्र साहले सहरी व्यवस्थापन र सार्वजनिक सरोकारका विषयमा सहयोग र समन्वय गरिदिन केन्द्र सरकारसँग आग्रह गर्नुभएको छ ।
सोमबार बसेको कामपाको १५औँ कार्यपालिका बैठकमा प्रमुख साहले केन्द्र सरकारलाई सहयोग गरिदिन आग्रह गर्नुभएको हो । विगत एक वर्षको अवधिमा केन्द्रका १४ मन्त्रालयलाई विभिन्न कामका लागि अनुरोध गरेको स्मरण गराउँदै उहाँले आशाअनुरुप सहयोग र समन्वय नभएको गुनासो गर्नुभयो । प्रमुख शाहले कामपा–५ हाँडीगाउँमा वडाले संरक्षण गरेको सार्वजनिक जग्गा महानगरको सहमति र अनुमति बिना नै कुनै संस्थालाई लिजमा दिन मन्त्रिपरिषद्ले गरेको निर्णय बदर गरिदिन भूमिसुधार, सहकारी तथा गरिबी निवारण मन्त्रालयको ध्यानाकर्षण गराउनुभयो ।
प्रमुख साहले जानकारी दिँदै भन्नुभयो, “गृह मन्त्रालयसँग अव्यवस्थित बस्ती व्यवस्थापन, ट्राफिक व्यवस्थापनका लागि सहयोग र समन्वय गर्न अनुरोध गरेका थियौँ । अहिले मूर्ति चोरीका घटना बढिरहेका छन् । यसमाथि निगरानी बढाउनु आग्रह गरेका थियौँ । विदेशी नियोगका संरचना भएका ठाउँमा पैदल यात्रुका लागि हिँड्ने ठाउँ छैन । उहाँहरुसँग समन्वय गरेर पैदल मार्ग खुलाउने विषयमा सहयोग गर्न परराष्ट्र मन्त्रालयलाई अनुरोध गरेका थियौँ”, उहाँले भन्नुभयो ।
सरकारी अस्पताल सरसफाइ र बीमा कार्यक्रम तथा मन्त्रालयको रहेको भवनको माथिल्लो भाग भत्काउन सर्वोच्च अदालतले दिएको आदेश पालना गर्न प्रमुख साहले, स्वास्थ्य तथा जनसङ्ख्या मन्त्रालयको पुनः ध्यानाकर्षण गराउनुभएको छ । विमानस्थलको नक्सा पास गर्न, त्यस क्षेत्रबाट जम्मा हुने बर्खाको भेलले पेप्सीकोला क्षेत्रमा हुने डुबानको समस्या समाधान गर्न, नेपाल संवत् सुरु भएको ठाउँमा मूर्ति र उद्यान बनाउन संस्कृति पर्यटन तथा नागरिक उड्डयन मन्त्रालयलाई अनुरोध गरिएको थियो । तीनकुनेको जग्गा अधिग्रहण गरेर व्यक्तिका नामबाट गैरकानुनी रुपमा लगत कट्टा गरिएको २४ रोपनी जग्गाको समस्या समाधान गर्न सङ्घीय मामिला तथा सामान्य प्रशासन मन्त्रालय र प्रधानमन्त्री तथा मन्त्रिपरिषद्को कार्यालयलाई आग्रह गरिएको प्रमुख साहले स्मरण गराउनुभयो । खोला कोरिडोर, सरसफाइ, अन्डरपास, नदी किनारामा तरल फोहोर प्रशोधन प्लान्ट, बञ्चरेडाँडामा लिचेड व्यवस्थापन तथा प्रशोधन प्लान्ट स्थापना, साइटमा आवतजावत गर्ने सडक र सडक बत्तीका लागि सहरी विकास मन्त्रालयसित अनुरोध गरिएको छ ।
यो जिम्मेवारी अहिले पनि पूरा भएको छैन । उहाँले यसलाई पूरा गरिदिन अनुरोध गर्नुभयो । रिङरोड विस्तार र उपत्यका यातायात प्राधिकरण गठन गर्न भौतिक पूर्वाधार तथा यातायात मन्त्रालयलाई, आइएसपी र टेलिकमबीच एकीकृत पूर्वाधार विकाससम्बन्धी विधेयक स्वीकृति गरिदिन सञ्चार तथा सूचना प्रविधि मन्त्रालयलाई, सडक बत्ती व्यवस्थापनमा सघाउन ऊर्जा, जलस्रोत तथा सिँचाइ मन्त्रालयलाई, सार्वजनिक जग्गा संरक्षणमा सघाउन भूमिसुधार, सहकारी तथा गरिबी निवारण मन्त्रालयलाई, विषादी परीक्षण गरेपछि मात्र उपत्यकामा तरकारी ल्याउने प्रबन्धका लागि कृषि तथा पशुपन्छी विकास मन्त्रालयलाई अनुरोध गरिएको छ ।
त्यसैगरी, बैठकले सहरी स्वास्थ्य प्रवद्र्धन केन्द्र सञ्चालन तथा व्यवस्थापन कार्यविधि, २०८०, सुवर्णपुर सम्पदा संरक्षण निर्देशिका, २०८० स्वीकृत गरेको छ । बैठकले सामुदायिक विद्यालयमा शिक्षक दरबन्दी मिलान र प्रधानाध्यापक नियुक्तिसम्बन्धी कार्यविधि तर्जुमा गर्न सैद्धान्तिक सहमति दिएको छ । टेकुमा महानगरका जग्गा एकीकरण आयोजना र मिसिल तथा तथ्याङ्क शाखा रहेको भवनको ब्लक ‘ए’ भत्काउने निर्णय भएको छ । विद्युत्को हाइटेन्सन लाइनका कारण उक्त भवन भत्काउनु परेको महानगरपालिकाले जनाएको छ ।
